Аусуратә ныҟәара хацыркын Афонҿыцтәи ахәшәтәырҭа аҭаарала, ара имҩаԥысит амедицинатә усзуҩцәа рԥылареи урҭ русура аҭагылазаашьа агәаҭареи. Ахәшәтәырҭа 5000 нызқьҩык инареиҳаны ауаа рымаҵ ауеит Афон ҿыц, иара убас Анхәа ақыҭа, Ԥсырӡха инхо ауааԥсыра налаҵаны, урҭ рахьтә 2000-ҩык ахәыҷқәа.
Ҳазҭагылоу аамҭазы ахыбра актәи аихагыла рҿыцуп. Аҩбатәи аихагыла арҿыцра аҭахуп, ахыб ԥсахуп, аӡы кылсӡом.
Аусбарҭа поликлиникаҵас аус ауеит, аха иара убас ара ҽынлатәи астационаргьы ыҟоуп.
Ахада Шьаҭанкылатәи аргылара аусбарҭа аиҳабы инапы ианиҵеит аусзуҩцәа русуразы аҭагылазаашьа аԥҵаразы апроект-харџьынҵатә документациа азырхианы арҽеиратә усурақәа рхацыркра.
Гәынба Бадра иҳәеит УЗИ аппарат аахәаразы афинансқәа шзаужьхо, ақалақь ахадеи аполиклиника аҳақьым хадеи рнапы ианиҵеит аультрабжьытә чымазараҭҵаара аҳақьыми отоларингологи ԥшааны ачымазцәа рыдкыларҭа ауадақәа раартра. Ахада иаҵшьны иҳәеит ари Афон ҿыци ааигәа ишьҭоу ақыҭақәеи рыҟнытә ауааԥсыра ианаамҭоу, еиҳа зхаҭабзиара еиӷьу ацхыраара рыҭара шалнаршо.
Анаҩс, аҳәынҭқарра Ахада Ԥсырӡха астанциеи Афонҿыцтәи абжьаратә школи рышҟа ицо амҩақәа рырҽеира ахьаҭаху дахәаԥшны ибеит. Ахада Шьаҭанкылатәи аргылара аусбарҭа анапы ианиҵеит апроект-харџьынҵатә документациа азырхианы амҩақәа рыҽеира ахьаҭаху аҭыԥқәа рыҟны аиҭашьақәыргыларатә усурақәа рымҩаԥгара.
Гәынба Бадра Афонҿыцтәи абжьаратәи ашкол даҭааит, аҵара ахьымҩаԥысуа ауадақәа рҭагылазаашьа гәеиҭеит, ашкол анапхгара иҭабуп ҳәа реиҳәеит арҽеиратә усурақәа раахыс 11 шықәса рышьҭахьгьы ахыбра нап ахьадыркылоз азы.
Аҳәынҭқарра Ахада даҭааит иара убас ақалақь аҟны иҟоу ашьапылампыл асразы ашҭа маҷ. Уи 15 шықәса инарзынаԥшуа аус ауеит. Ара ахәыҷқәа рҽазыҟарҵоит, аҭыԥантәи ауаагьы хәылбыҽхала ахәмаррақәа мҩаԥыргалоит. ́
Ахада Аҿар русқәеи аспорти ирызку аҳәынҭқарратә еилакы иадиҵеит ашҭа ахҟьа аԥсахра, аҽыԥсахырҭақәеи адуш кабинақәеи рышьақәыргылара. Гәынба Бадра иажәақәа рыла, ахарџьқәа рыхәҭак абиуџьет аҟнытә иазоужьхоит, ахәҭак — аҭыԥантәи абизнесуаа.
Ахада иара убас дахәаԥшны ибеит зеиҭашьақәыргыларатә усурақәа аанкылаз аспорт зал. Ари азҵааразы Ахада иаҵшьны иҳәеит Шьаҭанкылатәи аргылара аусбарҭа, иара убас аиҳабыра аԥхьаҟатәи афинансзаужьра алыршара рнапы ишанҵоу. Ари аобиект аусура иаларгахоит Ашықәс ҿыцынӡа.
Ахада даҭааит апоет, хатәгәаԥхаралатәи аибашьҩы, Леон иорден занашьоу Александр Бардодым иԥсыжырҭа. Аҳәынҭқарра Ахада иазгәеиҭеит ари аԥсыжырҭа ахьыҟоу апарк аҭагылазаашьа шыбааԥсу. Убри аан иҳәеит ааигәа иҟоу асасааирҭатә комплекс еиҭашьақәзыргылаз анаплакҩцәа Александр Бардодым ихьӡ зху апарки уи иаԥну ашҭеи реиҿкаара рхы ишадырҵаз.
Гәынба Бадра дахәаԥшны ибеит аихамҩатә вокзал. Ари аԥхьа аиҭашьақәыргыларатә усуразы азыӡба рыдыркылахьан, иара убас ашықәс нҵәаанӡагьы ахыркәшара. Ахада иажәақәа рыла, аҭоурыхтә ҵакы змоу ари аобиект еиҭашьақәыргылахоит аҭоурых-культуратә ҭынха аобиектқәа ирызку анормақәа инарықәыршәаны.
Анапынҵақәа зегьы рынагӡаразы аҿҳәарақәа азгәаҭоуп. Урҭ рынагӡашьазы иааиԥмырҟьаӡакәа Ахада адырра иҭахоит Шьаҭанкылатәи аргылара аусбарҭеи Афон ҿыц анапхгареи рыҟнытә.