Аҳәынҭқарра Ахада инаҵшьны иазгәеиҭеит имҩаԥысраны иҟоу афорум астратегиатә ҵакы, уи аихшьалақәа атәыла аекономика аҿиаразы шьаҭас — «амҩатә хсаалаҵас» иҟалараны ишыҟоу азгәаҭаны.

«Афорум алҵшәақәа иалкаау азыӡбақәа рымҩаԥгара иазкхароуп, ахықәкы хадақәа иалкаау аӡбамҭақәа ирзырхазароуп, Аԥсны аекономика ашьҭыхразы амҩатә хсааланы иҟалароуп», - иҳәеит Гәынба Бадра.

Ахада иара убас иазгәеиҭеит  афорум аҳәаақәа ирҭагӡаны Аԥсни,  Урыстәылатәи Афедерациеи, Алада Уаԥстәыла Ареспубликеи русбарҭақәеи рнаплакқәеи рыбжьарагьы убрахь иналаҵаны изҵаҩхо аиқәшаҳаҭрақәа ирымоу аҵак ду.

 Аҳәынҭқарра Ахада Аиҿкааратә еилакы алахәцәа азхьаирԥшит афорум аҽазыҟаҵара ҭакԥхықәрала, рҽеимаданы азнеира шаҭаху.

Аилатәараҟны Аԥсны Аҳәынҭқарра Аԥыза-аминистр дазааҭгылеит афорум аҽазыҟаҵара шымҩаԥысуа, аустә программақәа, аишәа гьежьқәа, ацәыргақәҵатә усмҩаԥгатәқәа убрахь иналаҵаны.

Аилатәара алахәцәа алацәажәеит аиҿкааратә усқәа, афорум акультуратә программа ирыдҳәалаз азҵаатәқәа, иара убас алахәцәа ршәардаҭара иазку ауснагӡатәқәа.