Ахада иҳәеит аспортсмен қәыԥш иеихьӡарақәа дышрызгәдуу, иазгәеиҭеит Аԥсны жәларбжьаратәи аренаҟны ахьӡ аларҵәаразы аспорт иамоу аҵакы.
«Акыр иаԥсоу Нестор, бзиала уаабеит ҳәа уасҳәоит. Ҳуқәгәыӷуан, ҳаумырԥхашьеит. Уқәра шмаҷугьы, хьӡы згахьоу, аԥхьаҟа аԥеиԥш бзиа змоу, ҳтәыла анҭыҵ хара ахыԥша бзиа аҭара зылшаз уруаӡәкуп.
Аспорти акультуреи —Аԥсны атәылауаа, уара уеиԥш иқәыԥшқәоугьы налаҵаны, жәларбжьаратәи аусмҩаԥгатәқәа рыҟны ҳтәыла хьӡы-ԥша аманы ацәыргара рылзыршо хырхарҭақәаны иҟоуп.
Иҭабуп ҳәа уасҳәоит иулуршаз азы. Сара издыруеит, хазхаҭалатәи аспорт мариаӡам, аҭакԥхықәра ду ацуп, аха уара ауадаҩрақәа зегьы уриааит, шьҭа гәадурала Аԥсны Аҳәынҭқарра ахьӡала уқәгылалар улшоит.
Аринахысгьы аихьӡарақәа узеиӷьасшьоит, иудыруазаргьы сҭахуп, аҳәынҭқарра уара уеиԥш иҟоу абаҩхатәра змоу аҿар адгылара шрынаҭало», — иҳәеит Гәынба Бадра.
Нестор Цәышба Ахада иқәгыларақәеи иҽазыҟаҵарақәеи шымҩаԥысуаз изеиҭеиҳәеит. Иазгәеиҭеит аицлабрақәа зегьы хшыҩзышьҭра, агәцаракра ду рыҭаны ишрызнеилатәыз, насгьы иҿыцу атактикатә знеишьақәа рыԥшаара шаҭахыз. Аиааиразы азыҟаҵара мацара азхаӡом, есааира ишәоу-изоу атактика азхәыцра шхымԥадатәиу.
Аспортсмен қәыԥш Ахада урыстәылатәи аспортсменцәа аӡәырҩы еиҵазааӡахьо Урыстәыла зҽаԥсазтәыз азыҟаҵаҩ Борис Собкин инапы зҵаҩу ашәҟәы ҳамҭас ииҭеит.
Аԥкьаҭмпыласҩы Цәышба Давид Ахада иҭабуп ҳәа иеиҳәеит ииҭаз адгыларазы.
«Бадра Зураб-иԥа, Шәара адгылара сышәымҭазҭгьы акгьы сылшаӡомызт. Иҭабуп ҳәа шәасҳәоит. Схы аасырԥшырц азы алшара сышәҭеит. Иеизгоу Урыстәыла акоманда азы сшыхәмаруагьы, аԥызацәа сыруаӡәкны сшыҟоугьы, ҳахьынтәааз зегьы ирдыруеит. Ари Аԥсны жәларбжьаратәи аренаҟны хьӡы аманы ақәгылара шалшо агәра ганы иаҳҳәартә алшара ҳнаҭоит. Адгылара иҳашәҭо хара уаныҟоу еиҳагьы иуныруеит, уи ҳара ахә ҳаракны иаҳшьоит. Ара аҿиара шымҩаԥысуа азгәазҭо рацәаҩуп, ари абаҩхатәра змоу аҿар ишрыхәо атәы рҳәоит», — иҳәеит иара.
Ахада иаҵшьны иҳәеит Нестор иҭаацәа аус ду шыҟарҵаз рыҷкәын профессионалтә спортсменны иҟаларазы алшара ирҭарц азы даҽа тәылак ахь иахьиасыз.
Аҳәынҭқарра Ахада иҳәеит аԥхьаҟа Нестор аԥсуа бираҟ даҵагыланы ақәгылара шилшо, аҳәынҭқаррагьы ас еиԥш аҿар адгылара шрынаҭало.
Ахада аспортсмен қәыԥш ҳамҭас ииҭеит Аԥсны Актәи Ахада Владислав Арӡынба исахьа зну аԥсар.
«Ари аҳамҭа ақәҵарҭаҟны иқәыргыланы иумаз, есқьынгьы уԥсадгьыл, иахьатәи ҳҳәынҭқарра ашьаҭаркҩцәа угәаланаршәалааит», — иҳәеит Гәынба Бадра.
Аԥкьаҭмпыласҩы қәыԥш Нестор Цәышба Tennis Europe асериаҟны жәларбжьаратәи аицлабрақәа ҩба рҿы абсолиуттә чемпионхеит азаҵәтәии аихацлактәии разриадқәа рыҟны атитулқәа ганы.
Аицлабра Zukunftstiften junior open 2025 powered by vion & WTV аҟны Вена (Австриа) Нестор аиааира игеит 13 шықәса рҟынӡа зхыҵуаз арԥарцәа рыҩныҵҟа.
Лиуксембург аицлабра Mosel Cup U12 by IMMO Capital Group аҟны Нестор иара убас аиааира игеит. Азаҵәтәи аразриад афинал аҟны Германиа ачемпион Себастиан Шерер дииааит, аихацлактәи аразриад аҟны Бельгиантәи идгылаз Ноем Гоберт иареи испаниа-францызтәи адует аиааира рылшеит.
Нестор Цәышба 13 шықәса рҟынӡа зхыҵуа рзы Урыстәыла аизгатә команда далоуп. Уи иҽазыҟаиҵоит аспорттә клуб «Спартак» аҟны Урыстәыла зҽаԥсазтәыз азыҟаҵаҩцәа Александр Злотоусти Анастасиа Андреева Мыскинеи рнапхгарала.