▫ ️ Аҳәынҭқарра Ахада Урыстәылатәи Афедерациа анапхгареи хаҭала Владимир Путини рыхьӡала иҭабуп ахиҳәааит иҟарҵо адгыларазы, инаҵшьны иазгәеиҭеит Урыстәыла мҽхакы ҭбаала иҟанаҵо ацхыраара Аԥсны аҿиаразы ахә ашьара шыуадаҩу.

▫️ Аиԥылараҿы ирылацәажәеит асоциал-економикатә усеицура азҵаарақәеи аԥыжәара змоу аинфраструктуратә проектқәа рынагӡареи. Ҷыдала, ирылацәажәеит аҳаирбаӷәаза аиҭашьақәыргылара амҩаԥысшьеи аихамҩатә еимадара аҿиареи. Иара убас иазааҭгылеит    ареспубликаҿы ашықәс зегьы аҩныҵҟа аԥсшьаразы аҭагылазаашьақәа раԥҵаразы ауснагӡатәқәа, ҳаамҭазтәи аглемпингқәа рыргыларагьы налаҵаны.

▫️ Гәынба Бадра иазгәеиҭеит атуристтә усхк аҿиара иамоу аҵак ду, ашықәс зегьы аҩныҵҟа уи аусура алыршара шхымԥадатәиу.

▫ ️ Сергеи Назаров адырра ҟаиҵеит Аԥсны имаҷуи ибжьаратәуи анаплакразы азинҷыда змоу акредит аҭаразы алшарақәа аус рыдулара шыҟало азы.

▫ ️ «Ҳара ҳзы акраҵанакуеит абизнес иақәнагоу азыԥҵәала акредитқәа ргара алшартә, анаҩс иҿиартә еиԥш адгылара аформа алагалара», — ҳәа инаҵшьны иазгәеиҭеит Сергеи Назаров. Иара иажәақәа рыла, уи иалнаршоит ареспублика анаплакҩцәа рфинанстә еидара акыр аиҵатәра.  

▫️ Иара убас ирылацәажәеит ааигәатәи аинвестициатә программақәа рышьақәырӷәӷәара, арыцқьагатә ргыламҭақәа рыргылара ахыркәшареи акурорттә қалақьқәа рыҟны ӡыла аиқәыршәара  асистема аиӷьтәреи рызҵаарақәа.

▫️ Ахада иажәақәа рыла, арҭ азԥхьагәаҭақәа рынагӡара ишаишоу аекономика арӷәӷәареи Аԥсны атәылауаа рыԥсҭазаашьа аиӷьтәреи ирыдҳәалоуп.