▫️ Аизара ду аҟны Афедерациа ахада ҿыцс далхын Иауз Аҭрышба. Уи икандидатура адгылара арҭеит Аизара иалахәыз аделегатцәа реиҳараҩык. Иауз Аҭрышба Аԥсны Аџьынџьтәылатә еибашьра далахәын.

▫️ Аԥсны Аҳәынҭқарра Ахада  Гәынба Бадра ҭелла  Аҭрышбба Иауз идиныҳәалеит Афедерациа анапхгаҩыс иалхра, изеиӷьеишьеит ақәҿиарақәа ҳауаажәлар рхаҭарнакцәа инапы ианырҵаз аус анагӡараҿы. 

▫️ «Аԥсны ашәарҭара ианҭагылаз бџьаршьҭыхла уашьцәа урывагылан уԥсадгьыл ухьчон, агәра ганы сыҟоуп Афедерациа анапхгараҿы аихьӡара дуқәа шааурԥшуа», - ҳәа азгәеиҭеит Гәынба Бадра. 

▫️ Аԥсны Ахада аҭел дылзасит иара убас Афедерациа анапхгарахь зкандидатура ықәгылаз Елиф Таԥшьԥҳа (Маршьанԥҳа). Бадра Гәынба уи ҭабуп ҳәа леиҳәеит аусуразы, иазгәеиҭеит ара иаиааизи иаҵахази шыҟам. 

▫️ «Аԥсны инхогьы Ҭырқәтәылеи егьырҭ атәылақәеи рҿы инхо ҳџьынџьуаагьы - зегьы жәларык ҳауп, ҳажәҩахыр еибыҭаны аус еицаҳауроуп ҳҳәынҭқарра аҿиареи, ҳбызшәеи ҳмилаҭтә хаҿра аиқәырхареи рус аҟны», - иҳәеит Гәынба Бадра.

▫️ Аҳәынҭқарра Ахада Афедерациа Ахада ҿыц  Аҭрышба Иаузи Елиф Таԥшьԥҳаи (Маршьанԥҳа) Аԥсныҟа ааԥхьара риҭеит.