"Хәажәкырамза 4 Аҧсны иахьатәи аҭоурых аҟны иҷыдоу аҭыԥ ааннакылоит. Абри амш аҽны ҩ-рыцхәк еиқәшәеит - Аҧсны Аҳынҭқарра Актәи Ахада Владислав Арӡынба иҧсҭазаара иалҵра амши Аҧсны Аҳынҭқарра Аҩбатәи Ахада Сергеи Уасил-иҧа Багаҧшь иира амши.

Машәырны иҟамлаӡеит уҳәартә иҟоуп Аҧсны аҭоурых аҿы арҭ аҩ-рыцхәк реиқәшәара - аамҭақәа реиқәҿыҭреи Аҧсны алахьынҵа аӡбараҟны иналукааша аҳәынҭқарратә усзуҩцәа рроли ралкаара иазку.

Владислав Арӡынба ихьӡ иадҳәалоуп ҳаамҭазтәи Аԥсуа ҳәынҭқарра ашьақәгылареи Аԥсны аџьынџьтәылатә еибашьраҿы аиааира агареи.

Сергеи Багаԥшь ари аҭоурыхтә мҩа иациҵеит. Иара напхгара аниуаз ашықәсқәа рзы Аԥсны аҳәынҭқарратә институтқәа рыҽдырӷәӷәеит,насгьы ихадоу аҭоурыхтә хҭыс анагӡара алыршахеит - Урыстәылатәи Афедерациа Аԥсны ахьыԥшымра азханаҵеит.

Арҭ арыцхәқәа реиқәшәара — напхгаҩык иԥсҭазаара иалҵра, егьи анапхгаҩы иира амш ҳажәлар ҩ-аамҭак реимадара иасимволны ирыдыркылеит. Ари иҳанаҳәоит Аԥсны аҭоурых ашьақәгылараҿы зхы-зыԥсы Аԥсуа жәлари Аԥсуа ҳәынҭқарреи рымаҵ аура иазызкыз ауаа иааныркыло аҭыԥ.

Владислав Арӡынбеи Сергеи Багаԥшьи ргәалашәара абиԥарақәа еиднакылоит, Аԥсны аҳәынҭқарра аҭоурых аҿы акрызҵазкуа хҭысны иаанхоит”.